கட்டாய வெற்றிக்காக பாகிஸ்தான் – இலங்கை இன்று பலப்பரீட்சை
Breaking NewsNews Of the Dayவிளையாட்டு
கட்டாய வெற்றிக்காக பாகிஸ்தான் – இலங்கை இன்று பலப்பரீட்சை
- துடுப்பாட்டம் மற்றும் பந்துச்சுக்கு இடையே சமநிலை கொண்ட ஆடுகளம்
– முதலில் துடுப்பெடுத்தாடி 45; பதிலெடுத்தாடிய 52 வெற்றிகள் பதிவு
– இந்த மைதானத்தில் முதல் இன்னிங்ஸின் சராசரி ஓட்டம் 138
ஆசிய கிண்ணத் தொடரில் இறுதிப் போட்டி எதிர்பார்ப்பை தக்கவைத்துக் கொள்ளும் தீர்க்கமான சுப்பர் போர் சுற்றுப் போட்டியில் இலங்கை மற்றும் பாகிஸ்தான் அணிகள் அபூதாபியில் இன்று (23) பலப்பரீட்சை நடத்தவுள்ளன.
இலங்கை அணி தனது முதல் சுப்பர் போர் சுற்றில் பங்களாதேஷிடம் தோல்வியை சந்தித்ததோடு பாகிஸ்தான் அணி தனது முதல் சுப்பர் போர் ஆட்டத்தில் இந்தியாவிடம் தோல்வி அடைந்தது. எனவே, இன்றைய தினம் கட்டாயம் வெல்ல வேண்டிய நிர்ப்பாந்தத்தில் இரு அணிகளும் உள்ளன.
பங்களாதேஷுக்கு எதிரான போட்டியில் இலங்கை அணி துடுப்பாட்டத்தில் கணிசமான ஓட்டங்களை பெற்றபோதும் கடைசி ஓவர்களில் ஓட்டங்களை அதிகரிக்க தவறி இருந்தது. குறிப்பாக தசுன் ஷானக்க தனது அதிரடி ஆட்டத்திற்கு திரும்பி அரைச்சதம் ஒன்றை பெற்றது இலங்கைக்கு சாதகமாக உள்ளது.
எனினும் பந்துவீச்சில் முக்கிய நேரங்களில் விக்கெட்டுகளை வீழ்த்த தவறியதும் இலங்கை அணியின் தோல்விக்கு காரணமாக இருந்து. எனவே, இன்றைய போட்டியில் பந்துவீச்சில் மாற்றங்கள் செய்ய வாய்ப்பு அதிகமாக உள்ளது.
மறுபுறம் பாகிஸ்தான் அணியிலும் இதே குறைகள் இருந்தன. இந்தியாவுக்கு எதிரான போட்டியில் அந்த அணி ஆரம்பத்தில் அதிரடியாக ஓட்டங்களை பெற்றபோதும் கடைசி ஓவர்களில் ஓட்டங்களை அதிகரிக்க தவறி இருந்தது. இதற்கு இந்த இரு போட்டிகளும் நடைபெற்ற டுபாய் ஆடுகளமும் முக்கியமான காரணமாக இருந்தது.
இன்றைய போட்டி நடைபெறும் அபூதாபி ஆடுகளம் துடுப்பாட்டம் மற்றும் பந்துச்சுக்கு இடையே சமநிலையை வெளிப்படுத்துவதாக உள்ளது. இங்கு முதலில் துடுப்பெடுத்தாடிய அணிகள் 45 முறைகளும் பதிலெடுத்தாடிய அணிகள் 52 தடவைகளும் வெற்றியீட்டியுள்ளன. இந்த மைதானத்தில் முதல் இன்னிங்ஸின் சராசரி ஓட்டங்கள் 138 ஆகும்.
இலங்கை அணிக்கு பாகிஸ்தான் தவிர, இந்தியாவுக்கு எதிரான போட்டியே சுப்பர் போர் சுற்றில் எஞ்சியுள்ளது. இந்தியாவை விடவும் பலவீனமாக அணியாக இருக்கும் பாகிஸ்தானை வெல்வது இலங்கை அணி இறுதிப் போட்டிக்கு முன்னேறுவதற்கு முக்கியமாக உள்ளது. அதேபோன்று ரன் ரேட்டிலும் பின் தங்காமல் இருப்பது முக்கியமாகும்.
சுப்பர் போர் சுற்றில் இந்திய அணி ஆதிக்கம் செலுத்தினால் மற்ற அணிகள் சம அளவான புள்ளிகளை பெறுவதற்கு வாய்ப்புகள் அதிகமாக உள்ளன. அந்த சந்தர்ப்பத்தில் இறுதிப் போட்டிக்கு முன்னேறும் அணியை தீர்மானிப்பதில் ரன் ரேட் முக்கியமாக உள்ளது.
Comments
Post a Comment