ரணில் விக்ரமசிங்கவிற்கு ஓக. 26 வரை விளக்கமறியல்

- பல்வேறு தடங்களுக்கு மத்தியில் இடம்பெற்ற வழக்கு விசாரணையின் பின் உத்தரவு

August 22, 2025 10:02 pm 0 comment

புகைப்படங்கள்

– இலங்கையில் முதன் முறை முன்னாள் ஜனாதிபதி ஒருவருக்கு விளக்கமறியல்

இன்று (22) முற்பகல் குற்றப் புலனாய்வு திணைக்களத்தில் வைத்து கைது செய்யப்பட்ட முன்னாள் ஜனாதிபதி ரணில் விக்ரமசிங்கவை எதிர்வரும் ஓகஸ்ட் 26 வரை விளக்கமறியலில் வைக்க உத்தரவிடப்பட்டுள்ளது.

கொழும்பு கோட்டை நீதவான் நீதிமன்றில் முன்னிலைப்படுத்தப்பட்ட ரணில் விக்ரமசிங்கவை விளக்கமறியலில் வைக்க நீதிமன்றம் அனுமதி வழங்கியுள்ளது.

தமது தனிப்பட்ட வெளிநாட்டு பயணத்திற்கு அரச நிதி பயன்படுத்தியதாக தெரிவிக்கப்படும் குற்றச்சாட்டு தொடர்பில் இடம்பெற்றுவரும் விசாரணைக்கு அமைய, குற்றப் புலனாய்வு திணைக்களத்தில் வாக்குமூலம் வழங்குவதற்காக வந்த முன்னாள் ஜனாதிபதி ரணில் விக்ரமசிங்க இன்று (22) முற்பகல் கைது செய்யப்பட்டார்.

தான் ஜனாதிபதியாக இருந்த காலத்தில் தனது உத்தியோகபூர்வ வெளிநாட்டு விஜயத்தின் நடுவில், இங்கிலாந்தில் இடம்பெற்ற தனது மனைவியின் பட்டமளிப்பு விழாவிற்கு செல்ல, ரூ. 1 கோடி 66 இலட்சம் (ரூ. 166 இலட்சம்) பொதுமக்கள் பணமான அரச நிதியை பயன்படுத்தியமை குற்றச்சாட்டிற்கு அமையவே அவர் கைது செய்யப்பட்டார்.

இலங்கையில் ஜனாதிபதியாக இருந்த ஒருவர் கைது செய்யப்பட்டமை மற்றும் விளக்கமறியலில் வைக்கப்பட்டமை இதுவே முதன் முறை என்பது குறிப்பிடத்தக்கது.

இதேவேளை, இன்று முற்பகல் 9.00 மணியளவில் குற்றப் புலனாய்வு திணைக்களத்தின் முன்னிலையான ரணில் விக்ரமசிங்கவிடம் வாக்குமூலம் பதிவு செய்யப்பட்டதைத் தொடர்ந்து கைது செய்யப்பட்டார்.

அதன் பின்னர் பிற்பகல் 3.00 மணியளவில் கொழும்பு கோட்டை நீதவான் நீதிமன்றில் முன்னிலைப்படுத்தப்பட்ட நிலையில், மிக நீண்ட வழக்கு விசாரணைகளைத் தொடர்ந்து சுமார் 6 மணித்தியாலங்களுக்கு மேல் இடம்பெற்ற வழக்கு விசாரணைகளைத் தொடர்ந்து அவரை விளக்கமறியலில் வைக்கும் உத்தரவை நீதவான் விடுத்துள்ளார்.

இவ்விசாரணைகளுக்கு நடுவே வழக்கு பல்வேறு தடவைகள் ஒத்திவைக்கப்பட்டமை குறிப்பிடத்தக்கது. இதன்போது ஏற்பட்ட மின்சாரத் தடை காரணமாகவும் வழக்கு விசாரணையை முன்னெடுப்பதில் தடங்கல் ஏற்பட்டிருந்தது.

வழக்கு விசாரணை வேளையில் முன்னாள் ஜனாதிபதி மைத்திரிபால சிறிசேன, நாமல் ராஜபக்‌ஷ உள்ளிட்டோரும் நீதிமன்ற வளாகத்திற்கு வந்திருந்தமை குறிப்பிடத்தக்கது.